Rainy day women

Rainy day women

Weiwer, wo de im Räe schtehscht

(E pälzer Blues, frei no es Zimermanns ihrm Robert)

 

 

Es gebt Weiwer, hasche die, dann hasch verlor!
Hann se dich am Bännel, kriesch blos noch uffs Ohr.
Denne sieht kä Deiwel aa, wie die so sinn.
Wer druff rinfallt, ja der schteht im Räe drin.
Weil zu allem, was de machscht, geht’s: Bä, bä, bä!
Vun so Weiwer, do is jedes Wort e Schtä!

 

Schaff’sche gudie Arwet, trotzdem flien die Schtä.
Unn verlierscht doi Arwet, ja, do flien noch mä.

Bringscht de Kaffee rer ans Bett, dann is der schlecht.
Du duscht rer viel zulieb, unn nix is recht.
Wann de määnscht, du werscht de arme Depp allä,
vun so Weiwer, do kriet jeder ab die Schtä!

 

Ja, do flien die Schtä, werds in de Wertschaft schpet.

Unn die selwe Schtä kriet ab, wer frieher geht.

Du hascht nix devu, heerscht uff zu saufe dann,

weil do flien die Schtä, unn’s hääst, du werscht kä Mann.

Mach der blos kä groe Hoor, bischt nät allä,

vun so Weiwer, do kriet jeder ab die Schtä!

 

Weiwerhelde dun mit Blinzelaue saa,

schäne Zeide het mer doch mit jed’re Fraa!

Wer de Meter kennt, der froot: Was is do schää,

flien vum Koppekisse noch ums Ohr die Schtää?

Häng de Rüssel nät zu dief, bischt nät allä,

vun so Weiwer do kriet jeder ab die Schtä!

 

Du kannscht mache, was de willscht, es flien die Schtä.

Wer des mitmacht, hat’s im Läwe nimmie schä.

Unn do flien die Schtä, willscht du dann vun de Brick.

Ja die schtumben noch, unn winschen dir viel Glick.

Holt dich dann de Deiwel, schteht die Sach nät faul:

Helleschtrof is fer so Weiwer halde s`Maul!

 

   
© Friedrich Treber